NASAAN NA ANG KABIKA?
hinahanap ko ang kabika ng tsinelas
ngunit di mahagilap saan napapunta
binti ko na'y namimitig at naninigas
kabika ng tsinelas ay di pa makita
naalala ko tuloy ang kwento ni Rizal
nang kabika'y tinangay ng agos sa ilog
isa pa'y hinagis sa ilog nang magtagal
nang makakita'y may magkabikang masuot
hanap ang nawawalang kabika o partner
tulad ng asawa o sintang iniibig
pag nagkatampuhan, nasa kaninong poder?
tangan ang prinsipyo, kanino ba titindig?
madalas, hanap agad natin ang kabika
na kung saan-saan natin aapuhapin
parang pagsintang wagas, prinsipyong dakila
na ating kinakapa sa diwa't damdamin
- gregoriovbituinjr.
09.10.2024
Walang komento:
Mag-post ng isang Komento