SALAWAHAN
wala akong silbing makatâ
kung pag-ibig ko'y salawahan
anong aking magiging mukhâ
sa harap ng giliw at tanan
ako'y talagang palamara,
taksil, ahas, lilo, at sukab
pagkat nangaliwâ sa sinta
pag-ibig pala'y di mag-alab
di ba't makata'y dapat tapat
sa pag-ibig ng kanyang pusò
at kung pagsasama'y maluwat
tutupad sa kanyang pangakò
iyan ang nais kong manaig
sa sarili't búhay kong iwí
makata'y tapat kung umibig
maging búhay man ay mapútí
- gregoriovbituinjr.
04.07.2026
Walang komento:
Mag-post ng isang Komento